విజయవాడలో డ్రైనేజీలో పడి ఆరేళ్ల బాలుడు మృతి
విజయవాడ Vijayawada News : తాజాగా హైదరాబాద్ లో భారీ వర్షం పడుతుండగా మౌనిక అనే బాలిక మ్యాన్ హోల్లో పడి చనిపోయిన ఘటన మరువకముందే ఏపీలోని విజయవాడలోనూ దాదాపు అలాంటి ఘటనే చోటు చేసుకుంది. విజయవాడలోని గురునానక్ కాలనీలో ఉన్న ఓ డ్రైనేజీలో పడిన ఓ ఆరేళ్ల బాలుడు నీళ్లలో కొట్టుకుపోయి ఊపిరాడక చనిపోయిన ఘటన తీవ్ర కలకలం రేపింది.బాలుడు గల్లంతు అయినట్లు తేలడంతో మున్సిపల్ సిబ్బంది వెంటనే రంగంలోకి దిగి గాలింపు చేపట్టినా ఫలితం లేకపోయింది.ఇవాళ మధ్యాహ్నం భారీ వర్షం కురిసింది.
వర్షం ధాటికి పలు రోడ్లు జలమయం అయ్యాయి.ఈ సమయంలో గురునానక్ కాలనీలోనూ వర్షం కారణంగా రోడ్లు జలమయం అయ్యాయి. గంటసేపు కురిసిన వర్షానికి మురుగుకాల్వలోనూ భారీగా నీరు చేరింది.అదే సమయంలో అక్కడే ఆడుకుంటున్న ఆరేళ్ల బాలుడు కాలుజారి నీటిలో పడిపోయినట్లు తెలుస్తోంది.దీంతో మురుగుకాల్వలోకి జారిపోయాడు. విషయం తెలియగానే మున్సిపల్ సిబ్బందికి స్ధానికులు సమాచారమిచ్చారు.
